Bêste Skanoleden en alle minsken dy’t mei it Frysk begien binne,
It is jimme fêst net ûntgien. De stúdzje Fryske Taal en Kultuer sit yn swier waar. Troch de nije reorganisaasje oan de RuG driget it Frysk yn Europeeske Talen en Kultueren (ETC) noch mar 1 fte (dat is ien dosint) oer te hâlden. Dat is fansels fierstente te min om in goede wittenskiplike oplieding garandearje te kinnen. Dêrmei sil de stúdzje in stille dea stjerre.
As der neat bart.
De stúdzje Frysk hat as twadde Rykstaal yn Nederlân bepaalde rjochten en ien dêrfan is in ‘selsstannige haadfakstúdzje’. Om’t ETC foar Frysk stiet foar in stjerhúskonstrúksje, hat Frysk keazen om net langer mei te dwaan oan ETC en selsstannich te bliuwen. Dy beslissing wurdt net samar troch de universiteit akseptearre. Dêrom moat de polityk oantrune wurde om in Fryske BA/MA-stúdzje oan de RuG no einliks definityf te garandearjen. It wurdt tiid om sels yn aksje te kommen. Want mei it ferdwinen fan de stúdzje Frysk sil ek in wichtige ympuls foar de Fryske taal ferdwine. Dat bestjut net allinne ferlies fan status (dat foar in minderheidstaal o sa belangryk is), mar ek it ferliezen fan takomstige wittenskippers, skriuwers, dosinten ensfh.
No tongersdei 19 april is de earste Fryske twitterdei. Der sil dy dei in soad twittere wurde yn it Frysk, mei #Frysk. Wat soe it moai wêze as der in hiele soad tweets giene oer de driigjende dea fan de stúdzje Frysk. Wy roppe jim massaal op om tongersdei (yn it Frysk fansels) hjiroer te twitterjen!
Fansels hoechst it net by ien tweet te litten. Hoe moat sa’n tweet der dan út sjen? Dat meist sels witte. Begjin fansels net te roppen en te razen, mar it mei dúdlik wêze dat it ferdwinen fan de stúdzje gewoan net kin!
In foarbyld:
Stúdzje Frysk yn Grins stjert in stille dea? Ek de ein fan it #Frysk ? @Frisian_RuG
Ferjit net om by dyn tweet te setten: #Frysk @Frisian_RuG
As der neat bart, sil de stúdzje Frysk nei beppekelder gean. It is gjin stoarm dy’t fansels wol wer oerwaait. Dêrom: kom yn aksje, jou it nijs troch en twitterje massaal op 19 april!
Is der faaks ek in hântekeningaksje of sa dy’t ik tekenje kin, of wat oars dat ik dwaan kin? Wat doch ik as ik út prinsipe net twitterje?
Wy binne op it stuit in diel fan de Skanomoduwebside oan it ynrjochtsjen om kommintaar kwyt te kinnen. Kinst dyn reaksje kwyt oan skanomail@skanomodu.nl. Dan pleatse wy dyn berjocht op dy pagina. It adres publisearje wy letter hjoed of moarn.
Fierder: diel it berjocht op facebook en lit it elkenien witte!
En wat set de RuG sels op har side: in moai stikje fertekenjende reklame! Yn in opfallend alarmearjend read kader! Ik begryp dat de RuG reklame meitsje moat foar de nije bachelor, mar hielendal suver is dy tekst net neffens my…
Fryslân hat ferlet fan akademisy dy’t Frysk studearre hawwe. Dosinten yn it HBO moatte yn ‘e takomst in akademyske oplieding yn har fak folge hawwe. Dat jildt ek foar de dosinten Frysk op de NHL yn Ljouwert.
Dat is seker wier. Noch in reden dat de twadde Rykstaal har iennichste universitêre stúdzje behâlde moat.
http://www.redfrysk.skanomodu.nl